曾智華
今日標題，你是否覺得毫無新意，想噓我添呢？唔⋯⋯反應正常！
但如果我問你，買間接近萬八蚊一呎的樓，住新界北，純貪佢搭一個港鐵站就到落馬洲，方便可以日日過深圳消費，咁你會點諗？
小弟並非樓市專家，早前見北區新樓盤開到一萬七千幾蚊呎，嘩的一聲，乜好似貴過市區樓喎，於是問人點解。
N咁多解釋，包括：一、近港鐵（香港十萬計單位都近港鐵兼上蓋添啦）；二、發展商成本好貴（投地加建築費及利息支出），一萬七千幾蚊呎都似乎冇肉食（呢點，關消費者乜事？佢哋賺幾千蚊呎時，又唔見回一半畀你？做生意會包賺的嗎？）；三、啱晒喜歡北上消費的長者，每日搭一個站，即可過關飲茶購物，方便到震，可享「香港居住，深圳消費」呀！
第三點聽落好似好有理由，但諗落其實毫無邏輯。點解？因「深圳居住，香港工作」我就聽得多，上邊住平一半，若賺香港薪金，合理又精明。點會倒轉「香港居住、深圳打工」㗎？
現實例子，我有兩對夫婦朋友，正正去年移入深圳住，六千幾蚊呎樓價，買入兜心口遠望住香港永無遮檔景觀的豪華大宅，有豪華會所，建築一流，管理高質素，只不過八百萬元。往返香港，十分鐘內已到車站過關，日日享受各區又新又靚商場及百花齊放的美食，賺盡兩地的好處。
呢種模式應是北區人未來生活大趨勢，尤其過關必定越來越易，處處一地兩檢。
總結，我就是諗極唔明，北區新樓點值近萬八蚊一呎？而嗰區更將會有幾千個新單位湧出，肯定爭崩頭。再者，將來的北區商場，又憑乜與「一站之遙」的深圳商場鬥？
咁貴點去貨？是否我睇錯？