曾智華
真真失驚無神，周一本欄寫《許氏兄弟與啟德無緣》，小弟只輕輕講出一個事實，再加引入多位老友記參加過啟德五萬人體育館的體驗，嘩嘩，搞乜呀，點解突然咁多人咁大反應，搞到似「轟傳」般誇張。
通常見報後，我都會順手將專欄上載個人社交平台，今次反應遠高預期，二十多萬人瀏覽，然後，洶湧留言，當然⋯⋯九成係鬧啦。
未夠，專欄內容竟然被各大傳媒「加鹽加醋加畫面」轉發，全部睇落畀小弟原文更吸引，怎不升級「瘋傳」？離譜到連內地媒體都落埋水「放大」。
同樣，全部都有無數留言，也是負評居多。
啟德園乃香港人「驕傲之作」，去過的，無不讚歎其宏偉現代。不過，硬件宏偉現代，咁軟件呢？各種措施及安排，可有以人為本，尤其是針對不同年齡的便民政策？
單單睇對啟德由交通到保安的種種安排，肯定公眾有大量不滿，尤其下車後，老人家要頂著暴曬、寒風、行雷、暴雨⋯⋯「山長水遠」才能入到體育館。另外，又唔准帶乜、唔准帶物（好在冇話唔准帶藥物），直接間接令唔年輕又唔力壯者諸多不便。
當然，主事者大可以話：「對唔住，家有家規，國有國法，條例如此，你唔想守咪唔好嚟囉，你有自由㗎！」
對對對，權在你手，我唯有查找自己身體不足，再決定敢唔敢去囉。
聽講周一文章引起了啟德園管理層少少震盪，覺得有點冤屈。好，小弟在此先講聲Sorry，唔好意思，煩到各位大哥大姐。
不過咁，睇過去幾日傳媒及公眾反應，似乎啟德園管理層欠了大家一個澄清，一個反應，包括究竟許氏兄弟仲有冇機會在此搞五萬人大合唱？若有，長者歌迷又點安排呢？