曾智華
政府牙醫不足，但現職加退休公務員連另一半，肯定有數十萬，每年一次洗牙，嘩嘩，咪幾十萬次？當然頂唔順。但合約寫明的福利，難道好似特朗普咁亂嚟，話冇咗就冇咗，話撕毁就撕毁？
美國政府可以冇口齒，但香港一定唔得。於是最方便一招——外判！我睇若再唔掂，可能專車車上深圳搞。
我近兩次洗牙——已被安排外判。老老實實，外判邊會有好嘢。政府招標，價低者得（若倒轉，分分鐘有人去Ｉ記投訴），除非完全唔專業亂咁嚟，否則，請接受低質素服務。
小弟兩年前去一間在紅磡的外判診所，真係睇見唔開胃，接待處六呎乘三呎，與另一位守候的公務員排排坐，屁股貼屁股。
入到小診所見醫生，20歲多，肯定剛剛畢業，睇卡片，在鄰近城市冇乜聽過的大學畢業，心都涼咗一截。
開波！身處三呎乘六呎診室，醫生女轉身都有問題，手勢亦業餘，洗到不正常的痛。
兩年過去，今次發達，訂到一間在旺角名牌商業大樓高層的集團式牙醫中心，與上次紅磡診所的感覺，天地之別，入到診室，起碼百幾平方呎，光光猛猛。
一位藍袍戴面罩口罩雙重保護工作人員（後來知是牙齒衛生員）命令：「請瞓好，唔使漱口！」
吓？洗牙前唔漱口？好彩我刷到乾乾淨淨來。
正準備接受佢開工之間，推門入來另一黃袍「蒙面俠」，權威口吻命我擘大口，用工具左睇睇、右睇睇：「切勿咬硬嘢，牙一甩就一世！想知自己副牙詳情，搵私家醫生照X光啦！」講完，轉身離開（後來知係醫生），留返個場畀「藍袍」，約五分鐘左右洗完，此時才漱口。
整體感覺——高級行貨！上次紅磡洗牙，則是——低級行貨。