黃秉華
「中國即將崩潰」姊妹作，是iBanker、學者羅奇的「香港玩完論」，核心理據是香港以前有國際認同的法治體系，如今安在哉？「我借余光中的詩，說一聲︰答案啊答案，在茫茫的風裏。」
話時話，我旁聽過余光中的課，差一點要走上教壇求索詩人親筆簽名。《江湖上》的精彩唱與和——一雙鞋，能踢幾條街？一雙腳，能換幾次鞋？一口氣，嚥得下幾座城？一輩子，闖幾次紅燈？——就令學生感到台灣新詩的魅力。
不過，學生有感而發，要改改你的詩——一雙眼，睇過龍有幾次？一張嘴，噏唔中咁都得？一頭煙，能抵得住畀人噓？一句話，能翻轉香港？——答案啊答案，在羅奇的心裏。
「師兄，你識作詩，點解讀書嗰陣唔蒲個頭出嚟？怕羞呀？」講呢啲，我最僧人唱衰香港、窒住個市。「哦，願聞其詳。」疫情過後，我以為中美可緩和，恒生指數慢慢慢慢升返去3萬點，天下太平，大家發財嘛。點知特朗普硬係同錢作對，第二任期變本加厲，唔係加稅，就係加辣制裁，再唔係玩脫鈎，更加出奇地搞出一場中東石油危機，家陣恒指幾多話，2萬6夠唔夠力上呀？
大家各有不同意見，不過，一致認為羅奇跟章家敦是有區別的，前者會認錯，事關孟子有云︰「雖有智慧，不如乘勢」，炒股之人就識得修正錯誤觀點，然後跟風而上，靠把口嘅「專家」就堅持到底。
「羅奇係苦肉計，實情𥄫住港股，伺機而行。」有啲可能噃。