近期在政治江湖中，已經並非秘密，就是頻頻有北方探子到港收風，徵集各路人馬對今屆政府表現的評價，因又要開始玩點指兵兵了。
四年飛快過去，下年又要換屆喇，究竟阿爺會如何布陣，邊個有得留低呢？
呢個咁Sexy話題，當然會越來越多人談論。近日小弟所有飯局，十之八九都會有人提問。
一般閒人，冇親身經驗，又冇關係，當然一嚿雲。但就算曾任問責高官者又如何？昨晚剛剛遇上一位X哥，當然成為主角，人人問佢點睇？
「有乜點睇吖，簡單估計，未到做冬，不會揭盅！事實，過去近三十年，不少特首、司長及局長，對自己的上台及突然落台，都冇話事權，一切要睇政治權力泉源的決定。這個，不單香港如此，美國又何嘗不是？」
X君笑笑口，灌完大杯紅酒再繼續：「如今全部問責官員，由特首到三位司長及所有局長，當被傳媒追問會否尋求連任時，一律不能答，因無論答會或唔會都死。所以，最平安又戴頭盔的指定答案為——目前我只集中做好分內工作，完成責任。傳媒再追就快啲轉身走！」
香港不似英美般的政治制度及文化，佢哋邊個想做總統、總理，一定要早早舉定手，再四出籌款及游說。香港又如何？無論做緊的或想做的，則幾大唔出聲唔表態，因為講咗冇得做咪好瘀！
老友，下任特首會邊個做呢？
睇歷任安排，最大可能性：一、超哥冧莊；二、陳國基上。
之外又如何？除董建華外，歷任特首皆必須做過政務司司長或行政會議召集人，因空降非常危險，若冇人服，又冇深厚政府運作經驗，一旦要領導幾十萬公職人員（政府及所有公營機構），失敗機率會好高！