曾智華
前朝在土瓜灣茶記食完早餐，順步行去有冷氣的車站急步行作運動（大佬，咁熱，若去公園，分分鐘中暑暈低呀）。
路經落山道及美善同道交界，哎吔吔，慘慘，但見一位阿伯瞓在馬路中央，好似冇乜知覺，旁邊有人大嗌：「唔好瞓呀，阿伯！」
原來佢剛過馬路時，被一輛慈善機構專接載長者的小巴撞到。幸而非主要道路，車速應不會太快，當然，被無情力一撞，後果仍可大可小。
香港交通警及救護車效率特高，三分鐘左右已經紅藍燈猛閃到場，立即作出初步急救，再抬上救傷車，火速「V-Woo V-Woo」送院。
究竟邊個引致意外，有待警方調查。
這類意外，實在令人感到非常無奈。小弟日日揸車出入土瓜灣這舊區，此處屋邨及護老院極密集，故此長者多不勝數，叫得長者，一如我自己，當然日漸手腳遲緩，反應越來越慢，不過，馬路總是要過的，咁點搞？
按道理，按法例，當然最好用斑馬線，否則就到紅綠燈位，再唔係，跟行人輔助線也可。但問題在，行動不便的長者，十之八九不會也不願行多幾十米搵斑馬線、燈位或行人輔助線，咁點？於是，不少話過就過，唔理喺邊，個別更唔理有冇車衝緊埋嚟。
我親身經驗，經常有長者抱著「恃老賣老」心態過馬路——你夠膽就撞埋嚟啦！當然次次我都停車讓路，但間中在雙線行車時，若我讓路而隔籬線另一架車唔讓，咁就分分鐘出事。
土瓜灣及深水埗呢類街道密集又住滿長者的舊區，真係處處是炸彈。點可減少或預防長者受傷？靠教育？長者多數唔理也唔聽。發告票罰佢哋亂過馬路？社會輿論必定反對。
咁搞，請問邊位智者可度出解決良方？