被譽為世界經濟學金頭腦的一班西方專家，真是太保守，你話我話嘅，呢班聰明人再不與時俱進，好快就冇嘢可撈——弊，口快快，唔記得席上有位大師兄的老友，係中環投資者翹楚。
「剛才你講的是事實。」德不孤，必有鄰。「例如關於人工智能，我都留意到金融界總是對此行業不太看好，點解？其實大家都有苦衷。」中環翹楚唔「囂」，更加有道理。「都怪中國AI行得太快，一旦行快過歐美，必有迴響。」先前德意志銀行經濟學家警告，大家不宜過度期待AI能完美複製1990年代的「生產力奇蹟」。
話說當時是互聯網經濟上位，成個世界都唔同晒，主因是美國領導者，美國掂，全世界就會掂，美國做不到的項目，除非美國話事人首肯，否則行得快過佢的對手，包你無運行。大家都記得上世紀八十年代日本半導體「過分美麗」，矽谷好無癮之餘，華盛頓就出手，結果一輪又一輪不同制裁與調查，日本變成「贏錢輸命」，美國反敗為勝。
大師兄知情識趣，適時改個無咁敏銳話題。「大家知唔知北京世界機械人大會，有一批外形高度接近真人的仿生機械人亮相。」咁又點？深圳有間初創Somnia夢伴計劃開發具有親密互動能力的機械人，打造一個「陪伴經濟」的新產業云云。
明解，到時夜總會會有新加盟一組「最善解人意」的人形機械人，包你滿意。咁都得？乜唔得，愛因斯坦名言︰「想像力比知識更重要。」信焉。